ຫວນຄະນຶງຄວາມຫລັງ
- ນັບແຕ່ ຈຸດເລີ້ມຕົ້ນ ຣະດູດ່ານ ເດືອນສິບສອງ ຄາວນັ້ນ
ຄສ ເຈັດສິບຫ້າ ມວນມາເຖິງ ເມກມຸງເມືອງຟ້າ
ອາທິດ ໂຄຈອນຜ້າຍ ເມໂຄ ຄຸມຂນາບ ເຕັມທີແລ້ວ
ແສງເຫລື່ອມ ອິດອ່ອນລ້າ ເງົາສລົ້ວ ບໍ່ສ່ອງໃຈ - ພຣະຈັນ ຖືກບີບຄັ້ນ ມະຫາເມກ ມຶນທືນ
ຣາຫູ ອົມກືນກິນ ງ່າຍດາຍ ໂດຍແມ້ງ
ສົມສື່ ສັກສີຊັ້ນ ຊາວລາວ ທັງປະເທດ
ຕົກຕ່ຳ ຄືດັ່ງເບັ້ຽ ແນວໄມ້ ຮາກບໍ່ມີ ໜ່າຍເດ - ອຳນາດ ຖືກໂຄ່ນລົ້ມ ເດັຽຣະດາດ ປານຂອນ
ລົມແດງ ມາພານພັດ ຖ່າວເທ ທັງສະທ້ານ
ຣັຖບານ ຖອຍຫລັງຫລົ້ມ ຕົກ ຂີ້ຕົມນ້ຳຂຸ່ນໆ
ລາວ ເລົ່າ ໄລລະຖີ້ມ ສຖານກວ້າງ ເກົ່າເດີມ ເສັຽດາຍເດ - ສ່ວນນື່ງ ຖືກກວາດຕ້ອນ ໄປບ່ອນ ສັມນາ
ປານນີ້ ຍັງວ່າຮຽນ ບໍ່ທັນສຸດ ເມື່ອໃດ ຊິຄືນບ້ານ
ສ່ວນນື່ງ ພາກັນ ຫລົບໄຫລຢ້ານ ໜີຕາຍ ຈາກປະເທດ
ມາ ເພີ່ງພາເພື່ອຊົ້ນ ທາງກ້ຳ ປະເທດໄທ - ປົບປ່ວງ ລະແຫ່ງຫ້ອງ ເຖີງ ປະເທດທີສາມ ກໍຫລາຍ
ລາງພ່ອງ ຍັງ ເລົ່າລືມຄວາມຫລັງ ບໍ່ກ່ຽວວົນ ນຳຊ້ຳ
ຫລາຍສ່ຳ ລາວລຽນໜ້າ ຂໍ ເນົາໃນປະເທດ
ດາບຢູ່ເໜືອ ຄໍຢູ່ໃຕ້ ນອນໄຫ້ ປາກບໍ່ດັງ ທ່ານເອີຍ - ອາສັຍຕໍ່ພີ່ ຊ້ຳ ຂີ່ແພໄມ້ຊຸ່ງ
ອາສັຍປ້າແລະລູງ ຊ້ຳ ຂີ່ແພໄມ້ເຮັ້ຽ
ເຂົ້າ ຢູ່ເຮືອນເໜືອ ເກືອ ຢູ່ເຮືອນໃຕ້ ຄີໄຟ ຢູ່ເຮືອນເພີ່ນ
ລາວ ຊິຮ້ອງຮຽກເອີ້ນ ຫັນໜ້າ ເພີ່ງຜູ້ໃດ ເດນໍ - ຍາມເມື່ອ ມີຕັ່ງອີ້ ຜົນປໂຍດ ເຕັມເມືອງ
ບໍ່ອຶດ ຄົນຄອຍສແວງ ຍາດກັນ ຈົນຊິປີ້ນ
ບາດວ່າ ດິນລາວຫລົ້ມ ຫັນແປງ ເປັນອື່ນ
ຫລາຍທ່ານ ຫລົບຫຼີກໜ້າ ໜີຊ້ຳ ບໍ່ກ່ຽວວົນ - ຍັງແຕ່ ກົບຂຽດນ້ອຍ ດີ້ນດັ່ນ ຢູ່ກາງໜອງ ຫັ້ນແລ້ວ
ທຸກທີ່ ເວີນວັງເຂີນ ຂາດ ຊົລທີນ້ຳ
ກົບຂຽດ ໂອໂອຍຮ້ອງ ຄາງດາຍ ດູເປົ່າ
ຍາມນີ້ ຍັງບໍ່ມີຕ່ອນຊີ້ນ ໝານ້ອຍ ບໍ່ຢາກເລັຽ ລະຕີ ./.
